الأولة كسرتي... والتانية المعذور

لما تقول للمتحرش اعتبرها اختك يا جدع... طب انت تعرف معاملته لاخته ازاى؟؟؟ هو معتبرها انسانه زيه ولا عبئ عليه و عار بيحاول انه يكتم نفسه أول بأول؟؟؟
تعرف أصلا انه طالع بيسمع امثال من عينه يا مخلفة البنات.... واكفي القدرة على فمها

انه عيب ان حد يعرف اسم امه ( بالمناسبة ده اصلا بسبب عادة صعيدي لان اسم الام كان بيستخدم في السحر و الاعمال ;)  )

لما يلاقي اللى يخلف بنت يقولوله عقبال ما تجيب الولد... و اللى بيخلف ولد يقولو في الاول انه بنت عشان الحسد

لما تلاقي الاب بيتفق مع عريس بنته على انها صفقة وانه لازم يكع دم قلبه... او يتعامل معاه احيانا انه عامل فيه جميلة لانه جاى ياخد بنته و يشيل عنه مسئوليتها
لما البنت تلاقي اهلها ( او هى نفسها) بيقارنو بين العرسان فقط على اساس مين هيدفع اكتر... لما تحسس نفسها انه ليها سعر وان دي الحاجة اللى ضامنه تاخدها من الراجل لفقد الأمان

لما يكون شغل الست انها بتساعد جوزها و القفة ام ودنين.... لكن رجولة جناب سعادته اتهانت لما يساعدها في شغل البيت

لما البنت تتولد و الاب و الام يحسو انهم وقعو على سند مديونية مش هيتصفى الا بجوازها

لما البنت تطلب حاجة اخوها عنده منها و تسمع كلمه ابقى خلي جوزك يجيبلك... مش هندفع قد كدا احنا و في الاخر يروح لبيت راجل غريب

لما البنت تلاقي ابوها ملهوف على نتيجة اخوها ولما هى تجيب تقدير عالى ممكن يقولها ياريته كان اخوكي

لما تلاقي الخوف عليها مبالغ فيه و تكتشف بعدها انه خوف من فضيحة ان يحصلها حاجة اكتر منه خوف عليها هى

لما تلاقي نفسها لازم تدى تقرير راحت فين و جت منين لكن جوزها حر انه ميقولش ومالوش مواعيد وانه اكيد كان وراه حاجات مهمة

لما تلاقي نفسها ممنوع عليها تعبر عن مشاعرها ولازم تستنى الولد انه يختارها من نفسه وهو اللى يعبر الأول

لما البنت تلاقى انها مش مسموحلها بمساحة مقفولة عليها وانه ممكن درجها يتفتح او موبايلها يتلعب فيه زي متكون موضوعة تحت المراقبة

المتحرش اخر من اهان المرأة لانه اتولد في مجتمع مش بيعمل اي حاجة قد ما يقلل من قيمتها

قبل ما المتحرش يتعدى باللفظ او ما زاد... المجتمع كله قبله اتحرش بكينونتها

لما تدمر الاعمدة الانسانية في حياتها واحد ورا التاني بالطريقة دي.... سبت اية للمتحرش يحترمه فيها
مينفعش بعد ما تقنعني ان الورقة دي زبالة اني ماشوطهاش برجلي و امشي